इलाम-२ : कांग्रेसलाई सुरुवाती अग्रता, रास्वपाका लिम्बू चौथो स्थानमा

इलाम- इलाम क्षेत्र नम्बर २ उपनिर्वाचनको मतगणनाको पहिलो अपडेट सार्वजनिक भएको छ। फाकफोकथुम १ नम्बर वडाको १५४१ मतगणना हुँदा कांग्रेस अघि अघि लागेको छ।

कांग्रेस उमेदवार डम्बर खड्काले उमेदवारले ६५७ मत प्राप्त गरेका छन्। दोस्रो नम्बरमा एमालेका सुहाङ नेम्वाङ्ले ५३४ मत प्राप्त गरेका छन्।

इलाम क्षेत्र नम्बर २ मा केही समय अघिबाट मतगणना सुरू भएको हो। यहाँ १९ उमेदवार चुनावी प्रतिस्पर्धामा छन् ।

यस्तै रास्वपाका मिलन लिम्बुले ११५ मत फ्याउँदा स्वतन्त्र उम्मेदवार डकेन्द्र थेगिमले मुढा चिह्नमा १८७ मत ल्याएका छन्।

प्रतिनिधिसभा सदस्यका लागि इलाममा बैशाख १५ गते उपनिर्वाचन भएको हो। संविधानसभा अध्यक्ष समेत रहेका सुवासचन्द्र नेम्वाङको निधन भएपश्चात् यहाँ उपनिर्वाचन गरिएको हो।

मुख्य निर्वाचन अधिकृत केशवप्रसाद घिमिरेका अनुसार नगरपालिका वडा नम्बर ७ मा रहेको गौतमबुद्ध सभागृहमा मतगणना भइरहेको छ।

एक लाख १५ हजार ८८९ मतदाता रहेको इलाम-२ मा ६९ हजार ४२१ मतदाताले मतदान गरेका छन्।

इलाम क्षेत्र नम्बर २ मा इलाम नगरपालिका, देउमाई नगरपालिका, माङ्सेबुङ गाउँपालिका, फाकफोकथुम गाउँपालिका, चुलाचुली गाउँपालिका र माई नगरपालिकाको ६, ७, ८ नम्बर वडा पर्छन्।