‘मापसे ट्राफिक’बारे राज्य व्यवस्थाका सभापति भन्छन्- सनकका भरमा जे पायो त्यही गर्न पाइन्न!

काठमाडौँ- उपप्रधान तथा गृहमन्त्री रवि लामिछानेको निर्देशनमा मादक पदार्थ सेवन गरी सवारी चलाउनेलाई कारबाही स्वरुप ट्राफिक प्रहरी बनाइएको विषयमा आलोचना सुरु भएको छ। राज्य व्यवस्था तथा सुशासन समितिका सभापति रामहरि खतिवडाले सनकका भरमा जे पायो त्यही गर्न नपाइने बताएका हुन्।

बिहीबार सिंहदरबारमा पत्रकारहरूसँग कुराकानी गर्दै खतिवडाले गृहमन्त्रीप्रति लक्षित यस्तो टिप्पणी गरेका हुन्।

‘सनकका भरमा जे पायो त्यही निर्णय गर्न पाइन्न। कानुनी राज्यको परिकल्पना गरेका छौं। तर कानुनी राज्य भनेको कसैको सनकका भरमा जतिखेर जे पायो त्यही निर्णय गर्ने होइन,’ खतिवडाले भने, ‘अहिले सडकमा केही मान्छेहरूलाई उपप्रधान तथा मन्त्रीको निर्देशनमा सडकमा उभ्याउने गरिएको छ, यो सरासर गलत छ।’

गृहमन्त्री लामिछानेले जेठ १५ गते गणतन्त्र दिवसका अवसर पारेर मापसे गरी सवारी साधन चलाउने चालकलाई कारबाही गर्न ट्राफिक बनाएर सडकमा खटाउने घोषणा गरेका थिए।

गृहमन्त्रीले सामाजिक सञ्जालबाट पोस्ट गरेको उक्त कुरालाई बुधबारदेखि काठमाडौं उपत्यका ट्राफिक प्रहरी कार्यालयले कार्यान्वयनमा ल्याउँदै कारबाहीमा परेका सवारी चालकलाई काठमाडौंका विभिन्न चोकमा ट्राफिक स्वयमसेवकका रूपमा परिचालन गरेको थियो।

महिनावारीका बेला महिला ट्राफिक प्रहरीलाई सडक ड्युटीमा नखटाउने र विकल्पमा मापसे ट्राफिक खटाइने कुरा फेसबुक र एक्समा पोस्ट गरेका थिए।

रविको पोस्टलाई आधार मानेर ट्राफिक प्रहरीले बुधबार सिंहदरबार चोक, माइतीघर, पुतलीसडक, पद्मोदय मोड, सातदोबाटो, चापागाउँ दोबाटो, भक्तपुरमा स्वयंसेवकलाई खटाइएको थियो।

‘मापसे ट्राफिक’ले थाले काम [फोटो फिचर]