गोर्खा मिडियामा रविका साझेदार छविलाई रुपन्देही लगियो

पोखरा- सहकारी ठगी आरोपमा पक्राउ परेका नेपाल प्रहरीका पूर्वडीआईजी छविलाल जोशीलाई बयानका लागि रुपन्देही लगिएको छ।

जिल्ला प्रहरी कार्यालय कास्कीको हिरासतमा रहेका जोशीलाई सोमबार रुपन्देही पठाइएको हो।

असोज ६ गते जोशी काठमाडौंको शंखमूलबाट पक्राउ परेका थिए। त्यसयता उनी कास्की प्रहरीको हिरासतमा थिए।

गोर्खा मिडिया प्रालिका पूर्वसञ्चालमध्येका एक हुन्। विभिन्न सहकारीको रकम गोर्खा मिडिया नेटवर्कमा ल्याएर दुरुपयोग गरेको आरोप उनीमाथि लागेको छ। गोर्खा मिडियामा हुँदा छवि र रवि व्यापारिक साझेदार पनि हुन्।

पोखराको सूर्यदर्शन सहकारीको रकम दुरुपयोगमा हिरासतमा रहेका जोशी बुटवलको सुप्रिम सहकारीको बयानका लागि रुपन्देही लगिएको हो।

सुप्रिमको मुद्दा यसअघि नै अदालत पुगिसेकेको छ। जोशीलगायतका व्यक्तिको संलग्नता खुलेको बखत पूरक अभियोजन बनाएर पुनः मुद्दा लग्ने बाटो भने खुल्ला रहेको छ।

सोही प्रयोजनका लागि सुप्रिम सहकारी ठगी प्रकरणको बयानका लागि जोशीलाई रुपन्देही लगिएको हो।

रवि पनि सोही मुद्दामा कास्की प्रहरीको हिरासतमा छन्। शुक्रबार साँझ काठमाडौँबाट पक्राउ परेका उनलाई कास्की लगिएको छ। शुक्रबारबाट लागू हुने गरी आइतबार कास्की अदालतले उनलाई थुनामा राख्न ६ दिनको म्याद दिएको छ।

कास्की प्रहरीले छविमाथि अनुसन्धान गरी रुपन्देही पठाएकाले रविलाई पनि कास्कीमा अनुसन्धान सकिएपछि रुपन्देही पठाउन सक्ने अनुमान गरिएको छ।