हारेका महर्जनलाई माओवादीले फेरि बनायो कीर्तिपुर मेयरको उम्मेदवार

काठमाडौँ- प्रमुख प्रतिपक्षी दल नेकपा माओवादी केन्द्रले मंसिर १६ गते हुने उपनिर्वाचनमा कीर्तिपुर नगरपालिकाको मेयर पदमा उठाउने उमेदवार छनोट गरेको छ।

माओवादी केन्द्रले प्राध्यापक डाक्टर शिवशरण महर्जनलाई उमेदवार बनाउने निर्णय गरेको छ।

नगर कमिटीले सर्वसम्मत निर्णय गरेर महर्जनलनई उमेदवमर बनाउन सिफारिस गरेको छ। उम्मेदवारमा सिफारिस महर्जन यसअघि जनताबाट एकपटक अस्वीकृत भइसकेका व्यक्ति हुन्।

गत स्थानीय तह निर्वाचनमा पनि उनी मेयरका प्रत्यासी बनेका थिए। तर, तेस्रो भए।

गत निर्वाचनमा कांग्रेसबाट उम्मेलदवार बनेका राजकुमार नकर्मी ९ हजार ४३ मतका साथ मेयरमा निर्वाचित हुँदा एमालेका केशवरत्न बज्राचार्यले ५५०७ मत ल्याएर दोस्रो हुँदा माओवादी केन्द्रबाट मेयरका उम्मेदवार बनेका शिवशरण महर्जनले ४०९० र उपमेयरका उम्मेदवार सुशीला बस्नेतले २२४० मत ल्याएका थिए।

अघिल्लै निर्वाचनमा अस्वीकृत बनेका उनै महर्जनलाई फेरि माओवादीले उम्मेदवार बनाउन लागेको हो।

यसअघि नै नेकपा (एमाले) ले कीर्तिपुर नगरपालिकाको प्रमुख पदमा डा. सुरेन्द्र मानन्धरलाई उम्मेदवार बनाउन सिफारिस गरेको छ। डा. मानन्धर एमाले केन्द्रीय सदस्य समेत हुन्। राष्ट्रिय प्रजातन्त्र पार्टी (राप्रपा)ले ध्रुव महर्जनलाई उम्मेदवार बनाउने भएको छ।

कीर्तिपुर नगरपालिकाका प्रमुख राजकुमार नकर्मीको निधन भएपछि उक्त पद रिक्त रहेको थियो। उपनिर्वाचन आगामी मङ्सिर १६ गते हुने तय भएको छ।