समस्याग्रस्त २० सहकारीका ऋणी र सञ्चालकलाई ऋण तिर्न ‘अल्टिमेटम’, नतिरे धितो लिलाम गर्ने

काठमाडौं। समस्याग्रस्त भएका विभिन्न २० सहकारी संस्थाहरुबाट ऋण लिएर नतिर्नेलाई समस्याग्रस्त सहकारी व्यवस्थापन समितिको कार्यालयले ‘अल्टिमेटम’ दिएको छ। कार्यालयले समस्याग्रस्त बनेका विभिन्न सहकारी संस्थाका सञ्चालक ऋणी, कर्मचारी,व्यवस्थापकलाई ऋण चुक्त गर्न भनेको हो।

सहकारीबाट लिएको ऋण चुक्ता नगर्ने सञ्चालक, कर्मचारी, ऋणी र व्यवस्थाकको सम्पत्ति लिलाम र जायजेथाबाट चुक्ता गर्ने चेतावनी समितिको कार्यालयले दिएको छ।

समस्याग्रस्त घोषणा भएका सहकारीहरूका सञ्चालक, ऋणी सदस्य, व्यवस्थापक तथा जिम्मेवार कर्मचारी र जमानीकर्ताहरूलाई पटक पटक ऋण चुक्ता गर्नका लागि जानकारी गराउँदासमेत हालसम्म ऋण नतिरेको कार्यालयले जानकारी दिएका छ।

यस्तै पूर्णरुपमा चुक्ता गर्न बाँकी रहेका ऋणीहरूले बुझाउनुपर्ने साँवा, ब्याज तथा हर्जानासहितको ऋण नतिरको, तोकिएको समयभित्र ऋण रकम चुक्ता नगरे सहकारी ऐन २०७४, सहकारी नियमावली २०७५ तथा अन्य प्रचलित कानुनबमोजिम धितो लिलाम तथा ऋणीको हक लाग्ने अन्य जायजेथाबाट असुल उपर गरिनेसमेत कार्यालयले स्पष्ट पारेको छ।

समस्याग्रस्त सहकारीमा स्टाण्डर्ड सेभिङ एण्ड क्रेडिट को अपरेटिभ लिमिटेड, प्यासिफिक सेभिङ एण्ड इन्भेष्टमेन्ट कोअपरेटिभ लिमिटेड, सोसाइटल बचत तथा ऋण सहकारी संस्था लिमिटेड, प्रभु बचत तथा ऋण सहकारी संस्था लिमिटेड, लुः निभा बहुउद्देश्यीय सहकारी संस्था लिमिटेड र ओरेण्टल को अपरेटिभ लिमिटेड रहेका छन्।

यस्तै कन्जुमर बचत तथा ऋण सहकारी संस्था लिमिटेड, कोहिनुर हिल सेभिङ एण्ड क्रेडिट कोअपरेटिभ लिमिटेड, भेगास बचत तथा ऋण सहकारी संस्था लिमिटेड, पशुपति सेभिङ एण्ड क्रेडिट कोअपरेटिभ लिमिटेड, तुलसी बहुमुखी सहकारी संस्था लिमिटेड, शिवशिखर बहुउद्देश्यीय सहकारी संस्था लिमिटेड, हाम्रो नयाँ कृषि सहकारी संस्था लिमिटेड रहेका छन्।

कृषि विकास बहुउद्देश्यीय सहकारी संस्था लिमिटेड, कान्तिपुर सेभिङ एण्ड क्रेडिट सहकारी संस्था लिमिटेड, श्री लालिगुराँस बहुउद्देश्यीय सहकारी संस्था लिमिटेड, गौतमश्री बहुउद्देश्यीय सहकारी संस्था लिमिटेड, गोरखा सेभिङ्ग एण्ड क्रेडिट सहकारी संस्था लिमिटेड र नेपाल सहकारी वित्तीय संस्था लिमिटेडका ऋणी, सञ्चालक, कर्मचारी र व्यवस्थापकलाई कार्यालयले ऋण तिर्न भनेको हो।

आईडल यमुना हाम्रो बहुउद्देश्यीय सहकारी संस्था लिमिटेडमा समाहित संस्थाहरू घेदुङ बहुउद्देश्यीय सहकारी संस्था लिमिटेड, नागरिक कल्याण बहुउद्देश्यीय सहकारी संस्था लिमिटेड, आइडल यमुना बहुउद्देश्यीय सहकारी संस्था लिमिटेड, तपाईं हाम्रो बहुउद्देश्यीय सहकारी संस्था लिमिटेड र हाम्रो सगरमाथा बहुउद्देश्यीय सहकारी संस्था लिमिटेड रहेका छन्। यि सहकारीमा एक खर्ब रुपैयाँ बढी बचत रकम दिन बाँकी छ।

बिनाधितो ऋण लगानी
समितिको कार्यालयले दिएको जानकारी अनुसार समस्याग्रस्त घोषित सहकारी संस्थाको सङ्ख्या २० छ।

समस्याग्रस्त सहकारी संस्थाहरूको अवस्था हेर्दा बिनाधितो ऋण दिइएको समस्या ९५ प्रतिशत देखिएको छ। बिनाधितो आफन्तको नाममा तमसुक बनाएर पैसा निकालिएको देखिएको छ।

सहकारी संस्थाहरुबाट बिनाधितो पैसा झिकेर जग्गा खरिददेखि पशुपालन, कलेज सञ्चालनसम्ममा खर्च गरिएको पाइएको समितिले जनाएको छ।

हैसियत नभएका सामान्य मान्छेलाई ऋणी बनाएर करोडौँ रुपैयाँ ऋण कायम गरिएकाले त्यस्ता व्यक्तिहरूबाट असुल हुने सम्भावना कम छ।