एकदिने रोजगार मेलामा ५० जनालाई रोजगारी

काठमाडौं– भक्तपुरको मध्यपुर थिमि नगरपालिकाले शनिबार सानोठिमीस्थित आदर्श माध्यमिक विद्यालय पसिरसमा आयोजना गरेको एकदिने ‘वृत्तिमार्ग निर्देशन तथा रोजगार मेला’मा ५० जनाले रोजगारी पाएका छन्। मेलामा राखिएका विभिन्न संघ–संस्था, उद्योग, व्यवसाय एवं रोजगारदाता कम्पनीले आवेदन दिएका ४८० मध्ये ५० जनालाई मेलास्थलमै रोजगारी दिएको आयोजक समिति संयोजक एवं नगरपालिका प्रवक्ता कृष्णहरि आचार्यले जानकारी दिए।

मेला अवलोकनमा आएका ५ हजार बढी युवायुवती एवं विद्यार्थीमध्ये मेला प्रदर्शनी कक्षमा रहेका विभिन्न रोजगारदाता कम्पनीमा ४८० जनाले रोजगारीका लागि आवेदन दिएको उनले बताए। मेलामा रोजगारी प्रदान गर्न इन्स्योर परियोजनाले ६, भक्तपुर चेम्बर अफ कमर्सले ५०, पूर्ण हस्तकला संकलनले ५०, प्रधानमन्त्री रोजगार कार्यक्रमका लागि ७२, मध्यपुर उद्योग वाणिज्य संघले ११, जिल्ला सहकारी संघ भक्तपुरले आठ, प्याब्सनले ११७, बालकुमारी महिला समाज मध्यपुर थिमिले ५०, रोजगारी सर्भिसेज प्रालिले ९८ जनाको व्यक्तिगत विवरण संकलन गरेका थिए।

मेलामा सबैभन्दा धेरै निजी विद्यालयको संस्था प्याब्सन भक्तपुरले ४१ जनाका लागि रोजगारी अवसर प्रदान गरेको छ। त्यसैगरी बालकुमारी महिला समूहले ३० र अन्य व्यावसायिक संघ–संस्थाले समेत गरी १ सय बढीलाई रोजगारीका लागि सुनिश्चितता गरेको जनाइएको छ।

मेलामा राखिएको वृत्ति मार्ग निर्देशन परामर्शमा १ हजार ६५० जनाले परामर्श सेवा लिएको वडा नं ३ का वडाध्यक्षसमेत रहेका आचार्यले बताए। मेलामा निजी उद्योगका १२, संघ–संस्थाका पाँच, प्राविधिक विद्यालयका आठ, खाना, स्वास्थ्य सेवा गरी कुल ३४ प्रदर्शनी कक्ष थिए।

मेला उद्घाटन गर्दै सांसद एवं कांग्रेस जिल्ला सभापति दुर्लभ थापाले मध्यपुर थिमिलाई शिक्षा, व्यावसायिक र पर्यटन गरी तीन क्षेत्रको केन्द्रका रूपमा विकास गर्न सकिने बताए। ‘मध्यपुर थिमिलाई विशेषगरी तीन क्षेत्रको केन्द्रका रूपमा विकास गर्न सकिन्छ । एउटा शैक्षिक केन्द्र, दोस्रो व्यावसायिक केन्द्र र तेस्रो यहाँको धार्मिक, सांस्कृतिक सम्पदाको संरक्षण गरी पर्यटन केन्द्रका रूपमा विकास गर्न सकिन्छ’, उनले भने।

मध्यपुर थिमिमा जुन सम्भावना छ, त्यसको विकास र विस्तार गर्न सके यहाँका नागरिकलाई यहीँ मलेसिया, दक्षिण कोरिया र अरब देश बन्न सक्ने उनले औंल्याए।

मध्यपुर थिमि नगरपालिका प्रमुख सुरेन्द्र श्रेष्ठले निर्वाचनमा जनतासमक्ष गरिएको रोजगारी अवसर सिर्जना गर्ने प्रतिबद्धता पूरा गर्न रोजगार मेला आयोजना गरिएको बताए। उनले मेलाका माध्यमबाट स्थानीयलाई रोजगारी दिने, रोजगारी खोजीमा रहेका युवा र रोजगारदातालाई प्रत्यक्ष भेट गराउने र युवा विद्यार्थीलाई उनीहरूको वृत्ति विकासका लागि परामर्श दिने उद्देश्यले मेला आयोजना गरिएको जानकारी दिए।

नगरपालिकाका उपप्रमुख विजयकृष्ण श्रेष्ठले अन्य मेलाको तुलनामा यो रोजगार मेला नौलो रहेको चर्चा गर्दै मेलाको यस पटकको अनुभव र सिकाइलाई ग्रहण गरी आगामी दिनमा पनि यस्तो मेला आयोजना गरिने बताए। बिहानैदेखि परेको वर्षाका बाबजुद मेलामा उल्लेख्य सहभागिता रहेको थियो। मेलालाई स्वीस सरकार विकास सहयोग एसडिसी, इन्स्योर परियोजना र हेल्भाटासको सहयोग थियो।