दुर्घटनाग्रस्त अवस्थामा भेटियो मनाङको हेलिकोप्टर

काठमाडौँ- मंगलबार बिहानदेखि बेपत्ता भएको मनाङ एयरको हेलिकप्टर दुर्घटना भएको अवस्थामा फेला परेको छ।

लिखुपिके गाउँपालिका वडा नम्बर-४ लाम्जुरा भन्ने स्थानमा दुर्घटना भएर आगो बलेको देखिएको जानकारी स्थानीयले आफूलाई जानकारी दिएको लिखुपिकेकी प्रमुख मीना कार्की बस्नेतले जानकारी दिइन्।

‘लिखुपिके गाउँपालिका वडा नम्बर-४ लाम्जुराका होटल गोलाका सञ्चालकले देख्नुभएको भन्नुभएको छ। हेलिकोप्टरमा आगलागी भइरहेको उहाँले देख्नुभएको हामीलाई भन्नुभएको छ,’ उनले भनिन्।

सोलुखुम्बुको सुर्केबाट काठमाडौंका लागि उडेको हेलिकोप्टर सोलुखुम्बुको लाम्जुराबाट सम्पर्कविहीन भएको थियो ।

हेलिकप्टरमा पाइलटसहित ६ जना यात्रु थिए। चेत गुरुङले उडाएको हेलिकोप्टरमा ५ जना मेक्सिकन नागरिक रहेको मनाङ एयरले जानकारी दिएको छ।

मनाङको यात्रु लिस्टअनुसार हेलिकोप्टरमा तिमा सिफुन्टेस जी फरनान्डो, गोनजालेक्स अब्रिक, गोन्जालेक्स ओकासिलियस, सिफुजेन्टस् जी मोक्स्रिटोस र रिनकोन इस्मेस रहेका छन्।

मनाङ एयरको एनए–एमभी कलसाइन हेलिकप्टर बिहान १० बजेर ५ मिनेटमा सम्पर्कविहीन भएको थियो।