उपत्यकामा हुइँकिँदै द्रुत बस

काठमाडौं– सार्वजनिक यातायातको सेवा नागरिकमैत्री नभइरहेका बेला सरकारले नै अबदेखि उपत्यकामा छुट्टै लेनमा हुइँक्याउने गरी सार्वजनिक द्रुत बस सेवा सञ्चालन गर्ने भएको छ। तर, यातायात व्यवसायी महासंघमा आबद्ध सवारीधनीका बस नै चलाइने भएपछि सेवा प्रवाह गुणस्तर हुने आशंका भने यथावत् छ।

सार्वजनिक यातायातका साधनले बिहान–बेलुकी कार्यालय समयसमेत यात्रु कुर्ने, १० मिनेटको यात्रालाई एक घन्टा लगाइदिने हुँदा कामकाजीले सास्ती बेहोर्दै आएका छन्। भौतिक पूर्वाधार तथा यातायात मन्त्रालयले काठमाडौं उपत्यकामा सार्वजनिक ‘द्रुत बस’ सेवा सञ्चालन गर्ने भएको हो।

भौतिक पूर्वाधार तथा यातायातमन्त्री प्रकाश ज्वालाले यात्रीले चाहेको समय गन्तव्यमा पुग्न सजिलो होस् भन्ने उद्देश्यले १ असोजदेखि ‘द्रुत बस’ सेवा सञ्चालन गर्ने निर्णय गरेको जानकारी दिए। उनले भने, ‘पहिलो चरणमा भक्तपुरको सूर्यविनायकदेखि रत्नपार्कसम्म ‘द्रुत बस’ सेवा सञ्चालन तयारी गरिरहेका छौं। त्यसपछि अन्य रुटमा पनि यस्तो सेवा सञ्चालन गर्नेछौं।’

यातायातमन्त्री ज्वाला, राज्यमन्त्री नन्दा चपाईं, मन्त्रालयका सचिव केशवकुमार शर्मा, यातायात व्यवस्था विभागका महानिर्देशक नारायणप्रसाद भट्टराई, ट्राफिक प्रहरीका प्रहरी नायब महानिरीक्षक, यातायात व्यवसायी महासंघका पदाधिकारीसहित बिहीबार मन्त्रालयमा बसेको बैठकले ‘द्रुत बस’ सेवा सञ्चालन गर्ने निर्णय गरेको हो।

मन्त्रालयका सचिव केशवकुमार शर्माले सुरुमा द्रुत बस सेवा अत्यधिक जामको समय बिहान ९ देखि ११ र साँझ ४ देखि ६ बजेसम्म सञ्चालन हुने जानकारी दिए। उनका अनुसार द्रुत बस सेवाका लागि सुरुमा ४० सिटभन्दा माथिका करिब २५ वटा बस सञ्चालनमा ल्याउने तयारी मन्त्रालयले गरेको छ। उनले द्रुत बस सेवा सञ्चालनका लागि छुट्टै लेन, बसको रङ फरक गरिने बताए।

मन्त्री ज्वालाले यसअघि दु्रत बस सेवाको सडक लेन बनाउन सडक विभागलाई र बसको आकार प्रकार, सफाइ र ‘रोड परमिट’ को व्यवस्था मिलाउन यातायात व्यवस्था विभागलाई निर्देशन दिइसकेका छन्।

यातायात व्यवस्था विभागका महानिर्देशक नारायणप्रसाद भट्टराईले भने, ‘जामको समयमा सूर्यविनायकदेखि रत्नपार्कसम्म सार्वजनिक यातायातमा आउँदा एक घन्टा ३० मिनेट लाग्ने गरेको छ। ‘द्रुत बस’ सेवा सञ्चालनपछि जामको बेला समेत ४५ मिनेटमा पुग्न सकिने गरी व्यवस्था मिलाउँदै छौं।’ दु्रत बस सेवा सञ्चालनका लागि मोबाइल एप प्रयोगमा ल्याइने हुँदा द्रुत बस कुन समय कुन ठाउँमा आइपुग्छ भन्ने जानकारी पाउन सकिने उनले दाबी गरे।