आइतबार देशभरका अस्पतालमा आकस्मिकबाहेकका सेवा बन्द गर्ने घोषणा

काठमाडौँ- नेपाल चिकित्सक संघले आइतबार देशभरका स्वास्थ्य संस्थामा आकस्मिकबाहेकका सेवा बन्द गर्ने घोषणा गरेको छ। शनिबार साँझ संघले एक विज्ञप्ति जारी गर्दै आफूहरूले दिएको अल्टिमेटममा माग पूरा नभएको भन्दै आइतबार आकस्मिकबाहेकका सेवा बन्द गर्ने घोषणा गरेको हो।

बुधबार हेटौँडाको सञ्चो अस्पतालमा कार्यरत डा विकास थापा र डा प्रशान्त बिडारीलाई बिरामीका आफन्तले पिटेका थिए। सम्पूर्ण दोषीहरूलाई कानुनी दायरामा नल्याएको संघको भनाइ छ।

आन्दोलनबारे जानकारी दिइएको विज्ञप्तिमा भनिएको छ, ‘आइतबार देशभरका सम्पूर्ण सरकारी स्वास्थ्य संस्था, अस्पताल, मेडिकल कलेज, निजी अस्पताल तथा क्लिनिकहरूमा आकस्मिक सेवा बाहेकका सम्पूर्ण सेवाहरू पूर्ण रूपमा बन्द गरिने।’

स्वास्थ्य संस्था सुरक्षाबलको व्यवस्था गरी भयरहित वातावरणमा स्वास्थ्य सेवा प्रवाह गर्ने व्यवस्था संघको माग छ। डाक्टर पिट्नेलाई पक्राउ गरी कानुनी कारबाहीमा ल्याउनु सट्टा जिल्ला प्रशासन कार्यालयलगायतले घटनालाई निस्तेज पार्न खोजेकोसमेत संघको आरोप छ।