सार्वजनिक बिदा फिर्ता लिएपछि प्रचण्डले भने- ‘जनयुद्ध दिवस’ मनाउन कसैले रोक्न सक्दैन

काठमाडौँ- प्रधानमन्त्रीसमेत रहेका नेकपा माओवादी केन्द्रका अध्यक्ष पुष्पकमल दाहाल प्रचण्डले जनयुद्ध मनाउने आफूहरुको नैसर्गिक अधिकार भएकाले यसलाई कसैले रोक्न नसक्ने बताएका छन्। सोमबार नेकपा माओवादी केन्द्रको केन्द्रीय समिति बैठकमा प्रचण्डले देशभरि जनयुद्ध दिवस मनाउने बताए।

‘भोलि जनयुद्ध दिवस मनाउने भनेर सरकारले निर्णय गरेको थियो। अस्ति भर्खरै शान्ति प्रक्रिया नटुंगिएको हुनाले जनयुद्ध दिवस मनाउन उचित नहुने भनेर अदालतले निर्णय गर्‍यो,’ प्रचण्डले बैठकमा राखेको भनेका थिए, ‘जनयुद्ध दिवस मनाउने हाम्रो नैसर्गिक अधिकारलाई कसैले रोक्न सक्दैन, रोकिँदैन। देशभरि भोलि जनयुद्ध दिवस मनाइन्छ।’

यद्यपि अदालतको निर्णयलाई शान्ति प्रक्रियाका बाँकी काम टुंग्याउने बेलासम्म सम्मान गर्ने उनको भनाइ थियो। १ फागुनमा काठमाडौँमा विधान सम्मेलनको उद्घाटन नै जनयुद्ध दिवसलाई सम्मान गर्दै मनाउने र देशभर आ–आफ्नो तरिकाले मनाउने पनि बताए।

प्रचण्ड नेतृत्वको सरकारले सार्वजनिक बिदाहरुको सूचीमा फागुन १ गते जनयुद्ध दिवस पनि थियो। तर सर्वोच्च अदालतले जनयुद्ध दिवसमा आम सहमति नभएको सार्वजनिक बिदा दिनु उचित नहुने भन्दै बिदा नदिन अन्तरिम आदेश दिएको थियो।

अदालतको उक्त आदेश अनुसार नै गृह मन्त्रालयले फागुन १ गते ‘जनयुद्ध दिवस’का लागि भन्दै यसअघि नै दिएको बिदा फिर्ता लिएको थियो।

सर्वोच्चले बिदा नदिन आदेश जारी गरे पनि उक्त आदेशलाई उल्लंघन गर्दै माओवादीले प्रमुख पद जितेका धेरै स्थानीय तहले १ फागुनलाई ‘जनयुद्ध दिवस’ भन्दै बिदा घोषणा गर्ने क्रम जारी राखेका छन्।

प्रचण्ड सरकारले फिर्ता लियो ‘जनयुद्ध दिवस’को सार्वजनिक बिदा

‘जनयुद्ध दिवस’मा किन बिदा नदिने? यस्तो छ सर्वोच्चको ठहर [पूर्णपाठ]