सिधाकुरा प्रकरण : ‘स्टिङ’ गर्ने तिमल्सिनालाई अदालत उपस्थित हुन आदेश

काठमाडौँ- सर्वोच्च अदालतले सिधाकुरा डटकमलाई अडियो उपलब्ध गराउन स्टिङ अपरेसन गर्ने राजकुमार तिमल्सिनालाई अदालतमा उपस्थित हुन आदेश गरेको छ।

न्यायाधीशद्वय हरिप्रसाद फुँयाल र महेश शर्मा पौडेलको इजलासले यस्तो आदेश गरेको हो।

बिहीबार बयानका लागि सर्वोच्च पुगेका सिधाकुराका प्रकाशक युवराज कँडेलले अडियोको स्रोत राजकुमार तिमल्सिना भएको बताएपछि उनलाई पनि बयानका लागि अदालतले बोलाएको हो।

अख्तियार दुरुपयोग अनुसन्धान आयोगका लागि तिमल्सिनाले ‘स्टिङ अप्रेसन’ गर्ने र सरकारी साक्षी बस्नेलगायतका काम गर्ने व्यक्ति हुन्।

सिधाकुराका सम्पादक नवीन ढुंगानासँग भने शुक्रबार बयान लिइने भएको छ।

चार सय भन्दा बढी स्टिङ अपरेसनका मुद्दामा सेटिङ भएको भन्दै सिधा कुराले गोप्य भनिएको अडियो सार्वजनिक गरेको थियो। उक्त सेटिङमा कान्तिपुरका कैलाश सिरोहिया र अन्नपूर्ण पोस्टका क्या रामेश्वर थापाको समेत संलग्नता भएको आरोप लगाइएको छ।

तर उक्त अडियो फेक भएको भन्दै सिरोहिया र थापालगायतका संलग्न भएका भनिएकाहरूले अभिव्यक्ति दिँदै आएका छन्।

यसअघि उक्त विषयमा सर्वोच्चमा मुद्दा परेपछि उक्त अडियो सहितको समाचार सामग्री हटाउन सर्वोच्चले आदेश जारी गरेको छ। उक्त आदेशले प्रेस स्वतन्त्रताको हनन भएको भन्दै विभिन्न टीकाटिप्पणी भइरहेका छन्।