रवि पक्राउबारे प्रचण्ड : बचाउनैपर्छ भन्ने ओलीजी हो, अहिले रवैया ठीक भएन!

काठमाडौँ– नेकपा माओवादी केन्द्रका अध्यक्ष पुष्पकमल दाहाल प्रचण्डले सहकारी ठगीको विषयमा संसदीय छानबिन समिति बनाउन हुँदैन भने एमाले अध्यक्ष केपी शर्मा ओलीले अडान लिएको बताएका छन्।

माओवादीले शनिबार काठमाडौँमा गरेको खबरदारीसभामा रास्वपा सभापति रवि लामिछानेलाई जुनसुकै हालतमा बचाउनुपर्छ भनेर ओलीले भनेको तर अहिले उनले देखाएको रवैया ठिक नभएको बताए।

आफूहरूको खबरदारी सभा रविको पक्षमा नभएर सरकारविरुद्धको भएको उनको भनाइ थियो।

‘रवि लामिछानेको कुरा चलिरहेको थियो। मैले तपाईं निर्दोष हुनुहुन्छ भने डराउनुपर्ने कारण के छ भनेको हो रवि लामिछानेलाई पनि,’ उनले भने, ‘त्यहीअनुसार बनोस् भनेको हो। बन्न हुँदैन भन्ने केपी ओलीजी हो। रविलाई हरहालतमा बचाउनैपर्छ भन्ने केपी ओलीजी हो।’ उनले सरकारले अहिले देखाएको रवैयाको आपत्ति जनाए।

प्रचण्डले एमाले र कांग्रेससँग सम्बन्धित व्यक्तिलाई छानबिन नगर्ने, तर अहिले प्रतिपक्षलाई मात्रै पूर्वाग्रह राख्ने तयारी बेठीक भएको बताए।