सभामुखले बोलाएको बैठक फेरि पनि निष्कर्षविहीन, कसले के भने?

काठमाडौँ- सभामुख देवराज घिमिरेले बोलाउको प्रमुख राजनीतिक दलका प्रमुख सचेतक र सचेतकहरूबीचको छलफल फेरि पनि कुनै निष्कर्ष निकाल्न नसकी समापन भएको छ।

सिंहदरबारस्थित कार्यकक्षमा कानून, न्याय तथा संसदीय मामिलामन्त्रीलाई पनि बोलाएर सुरु भएको बैठक कुनै निष्कर्षमा पुग्न नसकेको हो।

सभामुख घिमिरेले नीति तथा कार्यक्रमलाई जेठ १ गते संघीय संसदका दुवै सदनको संयुक्त बैठकमा राष्ट्रपतिले वाचन गर्ने कार्यक्रमको तयारी लगायतका विषयमा छलफल गर्न बैठक बोलाएका थिए।

जेठ १ गते सरकारको नीति तथा कार्यक्रम ल्याउने तयारी गरी साँझ ६ बजेका लागि बैठक बोलाइएको छ। तर सहकारी ठगीको आरोप लागेका गृहमन्त्री रवि लामिछानेमाथि छानबिन गर्न संसदीय समिति बनाउनपर्ने माग राखी कांग्रेसले सदनमा अवरोध गरिरहेपछि त्यसको समाधान निकाल्न सभामुखले गरेको प्रयास विफल भएको हो।

बैठकमा नेपाली कांग्रेस आफ्नो अडानबाट पछाडि हटेन भने सत्तारुढ दल कुनै पनि हालतमा संसदीय छानबिन समिति बनाउन नसकिने अडानमा कायमै रहे।

कांग्रेसका प्रमुख सचेतक रमेश लेखकले संसदीय छानबिन समिति बनाएर संसद्को अवरोध हटाउन सरकारले अग्रसरता लिनुपर्ने बताए। उनले भने, ‘छानबिन समिति गठनको निर्णयबाट हामी पछि हटेका छैनौं। समिति गठन नभई अन्य कार्यसूचीमा सदन अगाडि बढ्दैन।’

कानुन न्याय तथा संसदीय मामिलामन्त्री पदम गिरीले सहकारीका विषयमा संसदीय छानबिन समिति गठन गर्न नसकिने बताए।

बैठकबाट बाहिरिने क्रममा नेपाली कांग्रेसका प्रमुख सचेतक रमेश लेखकले संसद् अवरोधको निकास प्रधानमन्त्री पुष्पकमल दाहाल ‘प्रचण्ड’ले नै दिनुपर्ने बताए।

सोमबार दिउँसोसम्ममा संसदीय छानबिन समिति बन्ने उनको विश्वास छ।

‘मलाई विश्वास छ, भोलि दिउँसोसम्ममा सरकारले, सत्तापक्षले संसदीय छानबिन समिति गठन गर्ने कुरालाई अगाडि ल्याउनेछ,’ उनले भने, ‘बल नेपाल सरकारको कोर्टमा छ, कसरी डिल गर्छ त्यसमा भर पर्छ।’

एमालेका प्रमुख सचेतक महेश बर्तौलाले कांग्रेसले आत्महत्या गर्छु भने पनि संसदीय छानबिन समिति गठन नहुने बताए। ‘नेपाली कांग्रेसले आत्महत्या नै गर्छु भनेपनि माग यो माग पुरा हुनेवाला छैन,’ उनले भने। कांग्रेसको माग सहकारी पीडितले न्याय पाउने विषयसँग पनि जोडिएर नआएको उनले जिकिर गरे।

‘प्रमुख प्रतिपक्ष नेपाली कांग्रेसले उठाएको विषय कानुनसम्मत छैन। कांग्रेसले समितिका नाममा सरकार माग गरेको हो,’ एमाले प्रमुख सचेतक महेश बर्तौलाले सभामुखसँगको छलफलपछि सञ्चारकर्मीलाई प्रतिक्रिया दिँदै भने, ‘यो माग पूरा गर्न असम्भव छ।’

नीति तथा कार्यक्रम प्रस्तुत गर्न राष्ट्रपतिले मंगलबार संसद्का दुवै सदनको बैठक बोलाएको भन्दै त्यो बैठक प्रभावित नहुने उनले जिकिर गरे।

राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानबहादुर (ज्ञानेन्द्र) शाहीले प्रधानमन्त्री पुष्पकमल दाहाल ‘प्रचण्ड’लाई कारबाही गृहमन्त्रीसँग माग गरे।

उपप्रधान एवं गृहमन्त्री रवि लामिछानेले शनिबार चितवन पुगेर यसअघिको सरकारले सहकारी ठगीका आरोपित जीबी राईलाई भगाएको आरोप लगाएका थिए। त्यसकै काउन्टरमा शाहीले यस्तो माग अघि सारेका हुन्।

‘देशको गृहमन्त्रीले भनेको कुरा त हामीले विश्वास मान्नैपर्‍यो,’ उनले भने, ‘अपराधीलाई भगाउने प्रधानमन्त्रीलाई कारबाही हुनुपर्छ । गृहमन्त्रीले पक्राउ पुर्जी जारी गर्नुपर्छ।’

सभामुखले बोलाएको बैठक निष्कर्षविहीन, कांग्रेसको प्रश्न- गृहमन्त्री संविधानभन्दा माथि हो?