सुन तस्करी : भन्सारमा पोका खोलेर खोजी अपरेसन

काठमाडौँ- त्रिभुवन विमानस्थलस्थित भन्सार कार्यालयबाट जाँचपास भएर छुटेको समानामा झन्डै एक सय किलो सुन भेटिएपछि भन्सार कार्यालयमा फेरी सुन खोजी अपरेसन चलाइएकभो छ। थप सुन लुकाएर राखिएको हुनसक्ने आशंकामा भन्सारमा सुन खोजी जारी रहेको विमानस्थल भन्सार कार्यालयले जानकारी दिएको छ।

सुन रहेको आशंकामा विमानस्थल भन्सारमा आएका थप सामग्री परीक्षण भइरहेको छ। ‘हामीले शंका लागेका केही सामान हेरेका छौँ। १० प्याकेज खोलेर हेरिसक्यौँ। अझै पनि हेर्दैछौँ। तर थप सुन भेटिएको छैन,’ भन्सार कार्यालय स्रोतले भन्यो, ‘अब १३ वटा प्याकेज हेर्न बाँकी छ।’

सशस्त्र प्रहरी स्रोतले काठमाडौंका केही ठाउँमा पनि खानतलासी लिएको छ। थप सुन भेटिने आशंकामा अपरेसन चलाइएको हो।

मंगलबार त्रिभुवन अन्तर्राष्ट्रिय विमानस्थलस्थित भन्सार कार्यालयबाट बरामद गरिएको ठूलो परिणामको अवैध सुन जोख्नका लागि नेपाल राष्ट्र बैंक पठाइएको छ। राजस्व अनुसन्धान विभागका कर्मचारीहरुले राष्ट्र बैंक मुद्रा व्यवस्थापन विभाग अन्तर्गतको टक्सार महाशाखामा सुन पुर्‍याएको हो।

८ वटा पोका बनाएर सुन पठाएको छ। महाशाखाले सुनको परिणाम र गुणस्तर परीक्षण गरी निर्क्योल गर्नेछ। टक्सार महाशाखाले सुनको परीक्षण, नाप, जाँच गरेपछि बरामद गरेको सुन राष्ट्र बैंकको बैंकिङ विभागमा पठाउने काम गर्छ। मुद्दाको किनारा नलाग्दासम्म राष्ट्र बैंकले तौल नापजाँच गरिएको सुन मुचुल्का उठाएर राष्ट्र बैंकले राख्ने गर्छ।

बरामद गरिएको सुन सरकारलाई प्राप्त हुने अवस्था आएमा सुन राष्ट्र बैंकमा रहने र सुनको मूल्य बराबरको रकम नेपाल सरकारले प्राप्त गर्ने नेपाल राष्ट्र बैंकका सहायक प्रवक्ता नारायणप्रसाद पोखरेलले बताए।

मोटरसाइकलको ब्रेकसुमा लुकाइएर ल्याइएको १६० टुक्रा सुनको अनुमान तौल ८० देखि १०० केजीसम्म हुने अनुमान राजस्व अनुसन्धान विभागको छ।

यो प्रकरणमा विभागले हालसम्म ६ जनालाई पक्राउ गरेको छ। पक्राउ पर्नेमा रेडी ट्रेडका सञ्चालक दिलीप भुजेल, रामकुमार भुजेल, भन्सार एजेन्ट राजेन्द्र राई र ट्याक्सी चालक छन्। भान्जा दिलीपको बयानका आधारमा मामा रामकुमार पक्राउ परेका हुन्। मामाभान्जा बुधबार पक्राउ परेका हुन् भने बाँकी तीन जना मंगलबार पक्राउ परेका हुन्।
सुन तस्करी प्रकरणको अनुसन्धान व्यापारी दीपक मल्होत्रातिर समेत सोझिएको छ। मंगलबार भन्सार पास भएर बाहिर जान लागेको झन्डै एक सय किलो सुन तस्करीमा प्रकरणमा व्यापारी दीपक मल्होत्राको संलग्नता हुन सक्ने यो प्रकरणमा अनुसन्धान गरिरहेका अधिकारीको भनाइ छ।

यस घटनामा त्रिभुवन अन्तर्राष्ट्रिय विमानस्थलको भन्सार जाँच पास कसरी भएर निस्कियो भन्नेबारे छानबिन गर्न भन्सार विभाग अनुसन्धान शाखाका निर्देशक मानबहादुर पौडेलको नेतृत्वमा समिति गठन भएको छ।

सय किलो सुन तस्करी : ८ पोका बनाएर राष्ट्र बैंक पुर्‍याइयो सुन [८ तस्बिर]

सय किलो सुन तस्करी : अनुसन्धानको सुई दीपक मल्होत्रातिर

बरामद सुन जोख्न राष्ट्र बैंक पठाउने तयारी, तौलिएपछि के गरिन्छ?